რეალი პირველად დამარცხდა, ლიდერი ბარსელონაა

მალიორკა 1:0 რეალი
გამარჯვების გოლი ჟუნიორ ლაგომ გაიტანა

ესპანეთის ლა ლიგის მე-9 ტურის შაბათის მატჩები რეალის ვიზიტმა დაასრულა ბალეარის კუნძულებზე, "სამეფო კლუბი" მალიორკას დაუპირისპირდა და 0:1 დამარცხდა.

ეს რეალის პირველი მარცხია სეზონში, მალიორკამ კი "სამეფო კლუბს" ბოლო დეკადაში პირველად მოუგო. რეალი 18 ქულით მეორე ადგილზეა, მალიორკას 10 ქულა აქვს.

მე-7 წუთზე ჟუნიორ ლაგომ შესანიშნავი სოლო-გოლი გაიტანა კურტუას კარში და მალიორკა დააწინაურა. მალე ვიდეორეფერიმ მალიორკას კიდევ ერთი გოლი თამაშგარე მდგომარეობის გამო გააუქმა.

74-ე წუთზე ალვარო ოდრიოზოლამ ლაგოს წინააღმდეგ იუხეშა, მეორე ყვითელი ბარათი მიიღო და "სამეფო კლუბი" 10 კაცის ამარა დატოვა.

მალიორკა 1:0 რეალი

გოლი: 1:0 ჟუნიორ ლაგო (7)

რეალი (4-3-3): კურტუა - ოდრიოზოლა, მილიტაო, სერხიო რამოსი, მარსელო - ხამეს როდრიგესი, კაზემირო, ისკო (66. როდრიგო) - იოვიჩი (66. ვალვერდე), ბენზემა, ვინისიუსი (82. დიასი)