'პატარა გუნდის დიდი თამაში' - ხეტაფე კამპ ნოუზე ანხელის სუპერგოლმა ვერ იხსნა

• ბარსელონა 2:1 ხეტაფე
• ანხელის სუპერგოლი

ესპანეთის ლა ლიგის 24-ე ტურში კიკე სეტიენის ბარსელონამ მესამეადგილოსან ხეტაფეს 2:1 მოუგო და ქულებით (52) ლიდერს, მადრიდის რეალს დაეწია.

ბარსელონამ გოლები პირველივე ტაიმში გაიტანა - 33-ე წუთზე ლეო მესის გამჭოლი პასით ანტუან გრიზმანმა გახსნა ანგარიში, ხოლო 6 წუთში სერხი რობერტომ გაიტანა.

66-ე წუთზე 32 წლის ანხელ როდრიგესმა მასპინძელთა კარში სუპერგოლი გაიტანა, თუმცა ბარსამ 3 ქულა შეინარჩუნა, რაც ტერ შტეგენის ბრწყინვალე "სეივის" დამსახურებაა.

ბირდალასი (ხეტაფეს მწვრთნელი): "მატჩი 8-წუთიან მონაკვეთში წავაგეთ, რაც მსოფლიოს საუკეთესო ფეხბურთელის, ლეო მესის დამსახურებაა. არ დაგვავიწყდეს, რომ ჩვენ პატარა გუნდი ვართ, რომელმაც დიდი მატჩი ითამაშა და ფრეს მაინც იმსახურებდა".

კიკე სეტიენი (ბარსელონას მწვრთნელი): "მოსალოდნელი იყო, რომ გაგვიჭირდებოდა. პირველ ტაიმში კარგად ვითამაშეთ. 29-ჯერ დავჯარიმდით და მეტი ბარათი მივიღეთ, მგონი ყველაფერი ნათქვამია".