- ბოსტონ სელტიკსი 122:125 ტორონტო რეპტორსი
- მოქმედმა ჩემპიონმა მეორე ოვერტაიმში მოიგო
NBA-ს პლეი ოფში თითქმის ყველა მატჩი ძალიან დაძაბული და დრამატულია. ამ მხრივ ერთ-ერთი საუკეთესო ბოსტონისა და ტორონტოს მეექვსე თამაში გამოვიდა, რომელიც სელტიკსმა ორი ოვერტაიმის შემდეგ 122:125 დათმო, რამაც მოქმედ ჩემპიონი ჩემპიონი რეპტორსი გადაარჩინა - წინ მეშვიდე, გადამწყვეტი სუპერმატჩია!
დღის გმირი უდავოდ კაილ ლოური გახლდათ. გარდა იმისა, რომ მან ყველაზე მეტი, 33 ქულა დააგროვა (6/10 სამქულიანი), სწორედ ლოური გახლდათ ის კაცი, ვინც ტორონტო მეორე ოვერტაიმში 4 ქულით დააწინაურა, რაც საბოლოოდ გამარჯვებისთვის საკმარისი გამოდგა.
ასევე ძალიან კარგი იყო ნორმან პაუელი - 23 ქულა სკამიდან. ფრედ ვანვლიტმა ამჯერად 21 ქულას მოუყარა თავი. 10-ზე მეტი ქულა ჩააგდეს სერჟ იბაკამ (13), პასკალ სიაკამმა (12) და ოუ ჯი ანუნობიმაც (13 ქულა, 13 მოხსნა).
რაც შეეხება ბოსტონს: თუ არ ჩავთვლით იმედგაცრუებას კემბა უოკერის სახით (5 ქულა, 2/11), სელტიკსმა ტრადიციულად გუნდური კალათბურთი ითამაშა. საუკეთესო ჯეილენ ბრაუნი იყო (31 ქულა, 16 მოხსნა). ჯეისტონ ტეიტუმმა 29 ქულა და 14 მოხსნა გააკეთა, მარკუს სმარტმა სულაც სამმაგი დუბლის შესრულება შეძლო - 23 ქულა, 11 მოხსნა, 10 პასი. კარგი იყო დანიელ თაისიც (18 ქულა, 7 მოხსნა).
“მხოლოდ გამარჯვება გვჭირდებოდა. ორივე გუნდმა ძალიან მაგრად ითამაშა. მწვრთნელს ჩვენი ბოლომდე სჯეროდა,” - განაცხადა მატჩის შემდეგ კაილ ლოურიმ.
“ბოლოს საკმარისად გვქონდა შანსები, მაგრამ ისე კარგად ვერ ვთამაშობდით, როგორც საჭიროა. თუმცა არა უშავს. თავს კარგად ვგრძნობთ,” - ეს ბოსტონის ლიდერის, ჯეილენ ბრაუნის სიტყვებია.
ტორონტო რეპტორსსა და ბოსტონ სელტიკსს შორის მეშვიდე, გადამწყვეტი თამაში შაბათს გამთენიისას გაიმართება. გამარჯვებული აღმოსავლეთ კონფერენციის ფინალში გადის, სადაც მეტოქედ მაიამი ჰიტი ელოდება.
მატჩის მიმოხილვა
კომენტარები