- ქართველი კალათბურთელების მეტოქეები უნგრეთი, კვიპროსი და სლოვაკეთი იქნებიან
- ჯგუფების 2-2 საუკეთესო 1/2-ფინალში გავა და ჩემპიონობისთვის ბრძოლას გააგრძელებს
საქართველოს 16-წლამდე კალათბურთელთა ნაკრები ბულგარეთში გაემგზავრა, სადაც ფიბა-ს ჩელენჯერში მიიღებს მონაწილეობას. მოგეხსენებათ, კოვიდ-პანდემიის გამო, არც წლეულს ტარდება ევროპის ჩემპიონატი A და B დივიზიონების პრინციპით და მათ ნაცვლად მცირეგუნდიანი ჩელენჯერები იმართება.
საქართველოს ნაკრები, რომელსაც ირაკლი ტომარაძე და ნიკოლოზ ცინცაძე წვრთნიან, სოფიაში დაგეგმილ ჩელენჯერში მიიღებენ მონაწილეობას, სადაც გასული წლის შედეგებით რეიტინგით 19-25 ადგილებზე მყოფი გუნდები შეიკრიბებიან.
ბულგარულ ტურნირზე 7 ნაკრები 2 ჯგუფშია განაწილებული. საქართველო 4-გუნდიან ჯგუფში მოხვდა უნგრეთთან, კვიპროსთან და სლოვაკეთთან ერთად. მეორე ჯგუფი უკრაინამ, შვეიცარიამ და პორტუგალიამ დააკომპლექტეს. 2-2 საუკეთესო ნახევარფინალში გავა და გამარჯვებულის გამოსავლენად გააგრძელებს ბრძოლას, ჯგუფში ჩარჩენილი გუნდები კი მეხუთე-მეშვიდე ადგილებს გაითამაშებენ.
საქართველოს ნაკრებმა შეკრება ჯერ თბილისში, შემდეგ კი ხაშურში გაიარა. შემადგენლობა ასე გამოიყურება: საბა სალაძე, ნიკოლოზ აბულაძე, გიორგი ბერუაშვილი, ანრი ბელთაძე, ალექსანდრე დაუშვილი, ილია ჭავჭანიძე, ლუკა გორგოძე, თენგო გოგიშვილი, ვაჩე გეგეშიძე, ლუკა ლომთაძე, შოთა მაჭავარიანი, ლუკა ალავიძე.
U16 საქართველოს განრიგი
საქართველო – სლოვაკეთი, 16 აგვისტო, 21:00
კვიპროსი – საქართველო, 17 აგვისტო, 18:00
საქართველო – უნგრეთი, 18 აგვისტო, 21:00
კომენტარები