- მსოფლიოს მოქმედმა ჩემპიონმა სამხრეთ აფრიკამ კვლავ პირველ ადგილზე გადაინაცვლა
- 'ბორჯღალოსნებმა' მე-12 ადგილი შეინარჩუნეს და ფიჯისთან პრინციპული მატჩი ელით
- 'საქართველო ის ნაკრებია, რომელიც არასდროს ნებდება' - ფრანგებმა მატჩი შეაფასეს
- ნაკრების კაპიტანი მსაჯს: მესმის, რომ პატარა გუნდი ვართ - რატომ არ აჯარიმებთ მათ
მსოფლიო რაგბის რეიტინგში ლიდერი უკანასკნელი 2 თვის განმავლობაში მეოთხედ შეიცვალა. პირველობა დაიბრუნდა მოქმედმა მსოფლიოს ჩემპიონმა სამხრეთ აფრიკის ნაკრებმა, რომელმაც ახალი ზელანდიის წარუმატებლობით ისარგებლა.
შეგახსენებთ, რომ გასულ უქმეებზე “ქურციკებმა” ედინბურგში შოტლანდიას 30:15 სძლიეს, ახალი ზელანდია კი დუბლინში ირლანდიას სტუმრობდა და ანგარიშის გარდა, თამაშშიც აშკარად დაიჩაგრა – 20:29.
მოწინავე სამეულს გამოაკლდა და მე-5 ადგილზე გადაინაცვლა ავსტრალიამ, რომელსაც ძალიან წარუმატებელი ევროპული ტურნე აქვს. “ვოლაბები” პირველ შეხვედრაში შოტლანდიაში დამარცხდნენ (13:15), ამჯერად კი, ლონდონურ თვიქნემს სტუმრობდნენ და ინგლისთან 15:32 წააგეს. ავსტრალიის უკან მოტოვება სწორედ ინგლისმა და ირლანდიამ მოახერხეს, რომელთაც წინ თითო პოზიციით წაიწიეს.
საფრანგეთში განცდილი მარცხის მიუხედავად უცვლელი დარჩა საქართველოს ნაკრების პოზიცია. “ბორჯღალოსნებს” ისევ 73.73 აქვთ და მე-12 ადგილზე იმყოფებიან. ქართველი მორაგბეების წინ ფიჯია (76.61), რომელმაც უელსში მასპინძლებს დიდი ბრძოლა გაუმართა და მხოლოდ 23:38 დამარცხდა.
მომავალ შაბათს, 20 ნოემბერს, საქართველო და ფიჯი ერთმანეთს ესპანურ არანხუესში გაეჯიბრებიან და გამარჯვების შემთხვევაში, “ბორჯღალოსნები” კუნძულელებთან ჩამორჩენას საგრძნობლად შეამცირებენ. თუკი საქართველომ 15 და ნაკლები ქულით იმარჯვა, მეტოქესთან მხოლოდ 0.3-ქულიანი სხვაობა შერჩება, მეტით მოგების შემთხვევაში კი, “ბორჯღალოსნები” ფიჯის საერთოდაც გადაასწრებენ. სათქმელია ისიც, რომ ნებისმიერი ანგარიშით წაგება საქართველოს 1 ადგილით დააქვეითებს და სამოას უკან აღმოჩნდება.
მომავალი უქმეების თავზე მსოფლიო რაგბის რეიტინგში სხვა ცვლილებებსაც მრავლად უნდა ველოდეთ, რადგანაც არაერთი საინტერესო ტესტ-მატჩია დაგეგმილი. მათ შორის: შოტლანდია-იაპონია, იტალია-ურუგვაი, ინგლისი-სამხრეთ აფრიკა, რუმინეთი-ტონგა, უელსი-ავსტრალია, საფრანგეთი-ახალი ზელანდია, ირლანდია-არგენტინა.
მსოფლიო რაგბის რეიტინგი
1. სამხრეთ აფრიკა – 91.83 ქულა, 2. ახალი ზელანდია – 90.02, 3. ინგლისი – 86.61, 4. ირლანდია – 86.30, 5. ავსტრალია – 85.09, 6. საფრანგეთი – 84.25, 7. შოტლანდია – 82.78, 8. არგენტინა – 80.81, 9. უელსი – 80.39, 10. იაპონია – 78.54, 11. ფიჯი – 76.61, 12. საქართველო – 73.73, 13. სამოა – 73.59, 14. იტალია – 70.15, 15. ტონგა – 68.57, 16. რუმინეთი – 67.06, 17. ურუგვაი – 66.76, 18. აშშ – 66.54, 19. პორტუგალია – 65.84, 20. ესპანეთი – 65.42.
კომენტარები