- 'ქართველი ფეხბურთელი ლიგის საუკეთესო დრიბლიორთა შორისაც აღარ შედის'
- ხვიჩა კვარაცხელიას სტატისტიკური მაჩვენებლები მკვეთრად გაუარესებულია
რუსულმა Business gazeta-მ ყაზანის რუბინისთვის სეზონის პირველი ნახევარი შეაჯამა და ხვიჩა კვარაცხელიას თამაშს “მთავარი ჩავარდნა” უწოდა. აღნიშნულ ვებ-გვერდს საფუძვლად ცნობილი ანალიტიკური პლატფორმა Instat-ის მონაცემები უდევს, სადაც ქართველი ნახევარმცველის სტატისტიკურ მაჩვენებლებში უკუსვლა თვალსაჩინოა. აი, რას წერს რუსული საიტი:
“რუბინში ყველაზე დიდი უკუსვლა ხვიჩა კვარაცხელიას თამაშში შეინიშნება. ზაფხულში ის არ გაუშვეს ევროპულ კლუბში, რის შემდეგაც ახალგაზრდა ქართველმა მოიწყინა. გასულ სეზონში მან 4 გოლი გაიტანა და ამდენივე საგოლე პასი ჰქონდა, ახლა კი მხოლოდ გოლი და 2 პასი უგროვდება. საშუალოდ 90 წუთში ხვიჩა 2.2 საკვანძო პასს აკეთებდა, ამჟამად, ეს მაჩვენებელი 1.93-ს უტოლდება. მეტოქის საჯარიმოში მისგან 3.5 პასი მიდიოდა, მიმდინარე სეზონში კი მხოლოდ 2.8 პასი აქვს. კვარაცხელიაზე ჯარიმებსაც უფრო იშვიათად იღებენ: 44 წინა სეზონში, 26 – ახლა.
ქართველ ფეხბურთელს აღარ ეკუთვნის რუსეთის პრემიერლიგის საუკეთესო დრიბლიორის სტატუსიც. ეს ტიტული მისგან ცსკა-ს ფეხბურთელმა ჩიდერე ეჯუკემ გადაიბარა. კვარაცხელია 90 წუთის განმავლობაში 13-დან შვიდ წარმატებულ დრიბლინგს ახორციელებს და პროცენტული მაჩვენებლებით, უკვე ლიგის საუკეთესო ათეულშიც კი აღარ შედის”.
20 წლის ხვიჩა კვარაცხელია ყაზანის რუბინში მესამე სეზონს ატარებს და კლუბთან კონტრაქტი 2024 წლის 30 ივნისამდე აქვს გაფორმებული. Transfermarkt მას 18 მილიონ ევროდ აფასებს. ზამთრის სატრანსფერო ფანჯარა 1 იანვარს გაიხსნება და ყველაზე ხშირად ქართველ ფეხბურთელს პრემიერლიგის კლუბებს უკავშირებენ.
სხვათა შორის, სპორტ-ექსპრესმა რუსეთის ჩემპიონატის სატრანსფერო ცხრილი განაახლა და კვარაცხელია უკვე ვესტ ჰემის ფეხბურთელად მოიხსენია. “ხვიჩასთან მიმართებაში აშკარა ფავორიტი ვესტ ჰემია, სადაც უკვე თამაშობენ ექს-სპარტაკელი ალეკს კრალი და ცსკა-ს ყოფილი წევრი ნიკოლა ვლაშიჩი. ლონდონელები მზად არიან კვარაცხელიას სანაცვლოდ 15 მილიონი ევრო გადაიხადონ”, - წერს რუსული გაზეთი.
კომენტარები