Thumbnail

საქართველოს მორაგბეთა ნაკრების სამწვრთნელო შტაბმა 2022 წლის პირველი მატჩისთვის შემადგენლობა დაასახელა. 6 თებერვალს “მიხეილ მესხზე” პორტუგალიასთან გასამართი შეხვედრისთვის, 23-კაციან განაცხადში ოთხი დებიუტანტია და ერთი მათგანი თამაშს სასტარტო შემადგენლობაში იწყებს, სამი კი თადარიგშია.

საქართველოს რაგბის კავშირის პრესსამსახურის ცნობით, მოედანზე პირველივე წუთიდან ვიხილავთ მესამეხაზელ სანდრო მამამთავრიშვილს. სათადარიგოთა შორის არიან კვაჭი ლუკა ნიორაძე, მესამეხაზელი ნიკო აფციაური და ფრთა დავით მესხი. ნაკრებს უბრუნდებიან კვაჭი ვანო კარკაძე და მეორეხაზელი გრიგორ ქერდიყოშვილი.

გელა აფრასიძე

ძირითად შემადგენლობაში არიან ბურჯები გურამ გოგიჩაშვილი და ბექა გიგაშვილი, რომლებსაც მეორე ტაიმში მიხეილ ნარიაშვილი და ლუკა ჯაფარიძე შეცვლიან. მეორე ხაზში თამაშს იწყებს ლაშა ჯაიანი, ხოლო ნოდარ ჭეიშვილი მარქაფაშია. მესამე ხაზში პირველივე წუთებიდან ვიხილავთ ოთარ გიორგაძეს და თორნიკე ჯალაღონიას.

9 ნომრის პოზიციაზე სასტარტოშია გელა აფრასიძე, რომელსაც თედო აბჟანდაძე შეუწყვილდება, ცენტრში კი, ბოლო პერიოდის მსგავსად, მერაბ შარიქაძესა და დემე თაფლაძეს ვიხილავთ. ფრთებზე მირიან მოდებაძე და აკაკი ტაბუცაძე დადგებიან, ხოლო ფულბეკი ლაშა ხმალაძეა. 9 ნომრის მარქაფაშია ვასილ ლობჟანიძე, ხაზში კი ლაშა ლომიძეს ვიხილავთ.

ლევან მაისაშვილი

“ბიჭებმა დასახული გეგმის მიხედვით კარგად ივარჯიშეს. სამწუხაროა, რომ კოვიდ-ინფექციის გამო თავიდანვე გამოგვაკლდა მოთამაშეთა ნაწილი და შემდგომ, ვარჯიშის პროცესშიც განვიცადეთ დანაკლისი. აქედან გამომდინარე, მთლად კომფორტულად ვერ ვართ და გარკვეული გადაადგილებები მოგვიწია, მაგრამ საბედნიეროდ, გვყავს რეზერვი შავი ლომიდან. მთლიანობაში, სასურველი შემადგენლობა არ გვყავს, თუმცა ამას მეორე, კარგი მხარეც აქვს – სხვა მოთამაშეებს მიეცემათ თავის გამოჩენის შანსი“ – განაცხადა ბორჯღალოსნების მთავარმა მწვრთნელმა ლევან მაისაშვილმა.

ამასთან, ნაკრების თავკაცი გახარებულია იმით, რომ 6 თებერვალს ტრიბუნებზე გულშემატკივრებიც იქნებიან დაშვებულნი (სტადიონის საერთო ტევადობის 33%):

“გულშემატკივრის მხარდაჭერა ჩვენთვის მნიშვნელოვანი ფაქტორია. მათი გვერდში დგომით განებივრებულები ვართ. ეს ჩვენთვის დამატებითი ემოციაა და ვეცდებით, იმედები არ გავუწბილოთ“.

საქართველო პორტუგალიასთან

ხაზი: 15. ლაშა ხმალაძე (შავი ლომი, 88 კეპი, 53 ქულა), 14. აკა ტაბუცაძე (შავი ლომი, 15 კეპი, 60 ქულა), 13. დემე თაფლაძე (შავი ლომი, 12 კეპი, 5 ქულა), 12. მერაბ შარიქაძე (შავი ლომი, კაპ. 80 კეპი, 60 ქულა), 11. მირიან მოდებაძე (შავი ლომი, 16 კეპი, 35 ქულა), 10. თედო აბჟანდაძე (ბრივი, 28 კეპი, 188 ქულა), 9. გელა აფრასიძე (მონპელიე, 35 კეპი, 24 ქულა).

შერკინება: 1. გურამ გოგიჩაშვილი (რასინგ 92, 25 კეპი, 10 ქულა), 2. ვანო კარკაძე (ბრივი, 5 კეპი, 5 ქულა), 3. ბექა გიგაშვილი (ტულონი, 25 კეპი, 10 ქულა), 4. გრიგორ ქერდიყოშვილი (აჟენი, 7 კეპი, 5 ქულა), 5. ლაშა ჯაიანი (შავი ლომი, 12 კეპი), 6. ოთარ გიორგაძე (ბრივი, 29 კეპი, 25 ქულა), 7. სანდრო მამამთავრიშვილი (შავი ლომი, უკეპო), 8. თორნიკე ჯალაღონია (ბიარიცი, 12 კეპი, 10 ქულა).

სათადარიგოები: 16. ლუკა ნიორაძე (ორიაკი, უკეპო), 17. მიხეილ ნარიაშვილი (მონპელიე, 67 კეპი, 10 ქულა), 18. ლუკა ჯაფარიძე (ბრივი, 3 კეპი), 19. ნოდარ ჭეიშვილი (შავი ლომი, 33 კეპი), 20. ნიკო აფციაური (შავი ლომი, უკეპო); 21. ვასილ ლობჟანიძე (ბრივი, 61 კეპი, 55 ქულა), 22. ლაშა ლომიძე (შავი ლომი, 1 კეპი), 23. დავით მესხი (ენისეი, უკეპო).

კომენტარები

ბოლო ამბები