- კატარის მუნდიალზე 32 მონაწილიდან 27-ის ვინაობა ცნობილია
- 29 მარტს 5 საგზურის ბედი აფრიკაში გაირკვა, ორის - ევროპაში
- მოუსმინე: სტატიის აუდიო ვერსია
29 მარტს ევროპასა და აფრიკაში საკვალიფიკაციო პლეი ოფის ფინალურმა მატჩებმა 2022 წლის მსოფლიოს ჩემპიონატის კიდევ 7 მონაწილე გამოავლინა. ასე რომ, ახლა კატარის მუნდიალის 32 მონაწილიდან 27 უკვე ცნობილია.
ევროპაში პლეი ოფის ორი ფინალური მატჩი გაიმართა - პორტუგალიის ნაკრებმა ჩრდილოეთ მაკედონიას კიდევ ერთი სენსაციის მოხდენის შანსი არ მისცა და პორტუში მანჩესტერ იუნაიტედის ბრუნო ფერნანდეშის დუბლით 2:0 მოუგო. ამის წყალობით, პორტუგალია ზედიზედ მეექვსედ ითამაშებს მუნდიალზე. კრიშტიანო რონალდოს შესანიშნავი შანსი აქვს კარიერაში მეხუთე მუნდიალი ითამაშოს.
სილეზიაში პოლონეთის ნაკრებმა აღმაფრენით ითამაშა შვედეთთან და რობერტ ლევანდოვსკისა და პიოტრ ჟელინსკის გოლებით მეტოქე 2:0 დაამარცხა. კატარში პოლონეთი მეცხრე მუნდიალს ითამაშებს.
აფრიკაში ხუთი საპასუხო ფინალური მატჩი გაიმართა. ყველაზე დიდ ინტერესს, რა თქმა უნდა, სენეგალისა და ეგვიპტის დაპირისპირება იწვევდა. ბულაიე დიას გოლით სენეგალმა ძირითადი დრო 1:0 მოიგო (ეგვიპტემ შინ ამავე ანგარიშით) გაიმარჯვა. ყველაფერი პენალტების სერიაში გადაწყდა, რომელიც სალაჰმა და კომპანიამ ცუდად შეასრულა და 1:3 დათმო. სენეგალი მუნდიალზეა, ისტორიაში მესამედ.
მსოფლიოს ჩემპიონატზე ითამაშებს განის ნაკრებიც, რომელმაც ნიგერია ორი მატჩის ჯამში სტუმრად გატანილი გოლით დაამარცხა. განაში პირველი უგოლო მატჩის შემდეგ ნიგერიაში 1:1 დაფიქსირდა. ტომას პარტეის გოლს ტრუსტ-ეკონგმა უპასუხა, მაგრამ ეს შედეგი განელებს აწყობდათ. აღსანიშნავია, რომ აფრიკაში ჯერ კიდევ მოქმედებს სტუმრად გატანილი გოლის უპირატესობა, ამიტომაც გადაწყვიტა ყველაფერი ამ წესმა.
მაროკომ კონგოს ორი მატჩის ჯამში 5:2 მოუგო და დამსახურებულად გავიდა მუნდიალზე, ტუნისი მალის შინ 0:0 დაუზავდა, მაგრამ რადგან სტუმრად 1:0 ჰქონდა მოგებული, მუნდიალზე ეს არაბული ქვეყანა გავიდა. ალჟირი ძირითად დროში 0:1 დამარცხდა კამერუნთან (პირველ მატჩში სტუმრად 1:0 ჰქონდა მოგებული). ამიტომაც დაინიშნა დამატებითი ტაიმები. 118-ე წუთზე აჰმედ ტაუბას თავური დარტყმა, თითქოს, გადამწყვეტი გამოდგა, მაგრამ მე-4 კომპენსირებულ წუთზე (124-ე წუთი) ლიონის ფორვარდმა კარლ ტოკო ეკამბიმ კამერუნს მუნდიალის საგზური მოუპოვა.
მუნდიალის 27 მონაწილე: კატარი, გერმანია, დანია, ბრაზილია, საფრანგეთი, ბელგია, ხორვატია, ესპანეთი, სერბეთი, ინგლისი, შვეიცარია, ნიდერლანდები, არგენტინა, ირანი, სამხრეთ კორეა, იაპონია, საუდის არაბეთი, ეკვადორი, ურუგვაი, კანადა, განა, სენეგალი, პორტუგალია, პოლონეთი, ტუნისი, მაროკო, კამერუნი.
30 მარტს ორი საგზურის მფლობელი გვეცოდინება კონკაკაფის ზონიდან. დიდი ალბათობით, აშშ და მექსიკა.
კომენტარები