- ალკარასი 6:3, 6:1 ზვერევი
- ესპანელმა ტალანტმა კარიერაში მე-2 მასტერსი მოიგო და მსოფლიოს მე-6 ჩოგანი გახდება
19 წლის ესპანელი ტალანტი კარლოს ალკარასი საჩოგბურთო სამყაროს გაოცებას განაგრძობს. მურსიელმა ვარსკვლავმა მადრიდის მასტერსზე (საპრიზო ფონდი 6 575 560 დოლარი) თანამემამულე რაფაელ ნადალისა და სერბი ნოვაკ ჯოკოვიჩის დამარცხების შემდეგ, ფინალში გერმანელ ალექსანდერ ზვერევს 6:3, 6:1 მოუგო და ტურნირის ტრიუმფატორი გახდა.
საინტერესოა, რომ ალკარასმა ზედიზედ მე-10 მატჩი და მე-2 მასტერსი მოიგო (მან მაიამიშიც იმარჯვა). კარლოსს სეზონში მე-4, საერთო ჯამში კი 5 ტიტული მოუგროვდა, ამასთან, ბოლო 7 მატჩში რეიტინგის ტოპ 10-ის წევრებს აჯობა და მათთან უკვე ასეთი ბალანსი აქვს: 11 გამარჯვება, 6 მარცხი. სათქმელია ისიც, რომ განახლებულ რეიტინგში ის უკვე მსოფლიოს მე-6 ჩოგანი გახდება.
მადრიდში ტრიუმფალური ასპარეზობის წყალობით, ალკარასი პროფესიონალ ჩოგბურთელთა ასოციაციის (ATP) დაარსების დღიდან (1990 წელი) ყველაზე ახალგაზრდა ჩოგბურთელი გახდა, რომელმაც ერთი ტურნირის განმავლობაში ტოპ 5-ის ერთბაშად 3 წევრი დაამარცხა. როგორც აღვნიშნეთ, მე-3 ნომერ ზვერევამდე, კარლოსმა გზიდან ნადალი (მე-4) და ჯოკოვიჩი (1-ლი) ჩამოიშორა და ეს, ყველაფერი 19 წლისა და 3 დღის ასაკში.
“ვფიქრობ, რომ უკვე მზად ვარ, რათა დიდი სლემის ტურნირიც მოვიგო. მიმდინარე სეზონში ჩემი მთავარი ამოცანა სწორედ ესაა და ამისთვის ბევრ მუშაობას ვაპირებ”, - განაცხადა ალკარასმა, რომელიც მოგებული მატჩებისა (28) და ტიტულების (4) მხრივ მიმდინარე სეზონის ლიდერი გახდა.
კარლოსის ტრიუმფს ხუმრობით გამოეხმაურა ფინალისტი ზვერევი: “მსოფლიოს საუკეთესო ჩოგბურთელი ხარ და ეს, მიუხედავად იმისა, რომ მხოლოდ 5 წლის ხარ. მაინც ყველას უგებ. ჩოგბურთისთვის ძალიან კარგია, რომ გამოჩნდა სუპერვარსკვლავი, რომელიც დიდი სლემის ბევრ ტურნირს მოიგებს და მსოფლიოს პირველი ჩოგანიც გახდება”.
📺 ალკარასი V ზვერევი
კომენტარები