- უეფაში ევროპის სუპერთასის ახალ ტურნირად გადაკეთებაზე ფიქრობენ
- ოთხთა ტურნირში ევროთასების გამარჯვებულები და MLS-ის გუნდი ითამაშებს
- მოუსმინე: სტატიის აუდიო ვერსია
უეფაში ევროპის სუპერთასის ახალ ტურნირად გადაკეთებაზე ფიქრობენ, რომელშიც გუნდები ამერიკული MLS-იდანაც იქნებიან მოწვეულნი. ესპანური მედიის ინფორმაციით, ევროპული ფეხბურთის მმართველი ორგანიზაცია მინი-ტურნირის ვარიანტს განიხილავს და ამის ერთ-ერთი მთავარი მიზეზი, ბუნებრივია, შემოსავლების გაზრდაა.
ჩანაფიქრის თანახმად, შეჯიბრებაში მონაწილეობას 4 გუნდი მიიღებს, გათამაშების ფორმატი კი ესპანეთის სუპერთასის ანალოგიური შეიძლება იყოს. ტურნირში ითამაშებენ ჩემპიონთა ლიგის, ევროპალიგისა და კონფერენსლიგის გამარჯვებულები და MLS-ის ჩემპიონი.
უეფა, რომელიც ამერიკულ ბაზარს პერსექტიულ მიმართულებად მიიჩნევს, ტურნირის ჩატარებას ზაფხულობით აპირებს, მატჩები კი ევროპის გარეთ იქნება გადატანილი.
ევროპის სუპერთასი 1972 წლიდან ტარდება და მისი მოგება ყველაზე მეტჯერ (5-ჯერ) სამმა კლუბმა შეძლო: ბარსელონამ, მილანმა და მადრიდის რეალმა. ევროპის სუპერთასის მოქმედი გამარჯვებული მადრიდის რეალია, რომელმაც 2022 წლის შეხვედრაში აინტრახტი დაამარცხა (2:0).
MLS (Major League Soccer) 1993 წელს შეიქმნა და მასში აშშ-ისა და კანადის საუკეთესო კლუბები არიან გაერთიანებული. 2021 წლის სეზონში ლიგის ჩემპიონი ნიუ იორკ სიტი გახდა.
კომენტარები