- 24 წლის ბელარუსმა ჩოგბურთელმა მსოფლიო რეიტინგში მე-2 ადგილიც გაინაღდა
- AUS OPEN | რიბაკინა პირველი ფინალისტია - უიმბლდონის ჩემპიონმა აზარენკას მოუგო
24 წლის ბელარუსი ჩოგბურთელი არინა საბალენკა დიდი სლემის ტურნირის ფინალში კარიერაში პირველად გავიდა, რისი წყალობითაც მომავალი კვირიდან WTA-ს რეიტინგში მე-2 ადგილზე გადაინაცვლებს.
მელბურნის როდ ლეივერის სახელობის არენაზე გამართული ავსტრალიის ღია პირველობის ნახევარფინალში საბალენკამ პოლონელი მაგდა ლინეტი 7:6 (7:1), 6:2 დაამარცხა.
თამაში საათნახევარი გაგრძელდა და ბელარუსმა ჩოგბურთელმა 6 ეისისა და 2 ორმაგი შეცდომის ფონზე მეტოქის მოწოდება 3-ჯერ მოიგო, თავად კი მხოლოდ ერთხელ დაბრეიკდა.
არინა ძალიან შემტევ ჩოგბურთს თამაშობდა და მართალია, უნებლიე შეცდომა მეტი ჰქონდა (25:16), ვინერსებში გაცილებით უკეთესი მაჩვენებელი (33:9) დააფიქსირა. ცხადია, რომ ასეთი სტატისტიკით, მსოფლიო რეიტინგში 45-ე ადგილზე მყოფ პოლონელ ჩოგბურთელს წარმატების შანსი არ ჰქონია.
საბალენკა Australian Open-ზე მეექვსედ თამაშობს და მისი მაქსიმუმი მე-4 წრე იყო, ამჯერად კი, მელბურნში ზედიზედ 6 მატჩი ისე მოიგო, რომ სეტიც კი არ დაუთმია. ლინეტამდე, ბელარუსმა ჩოგბურთელმა ჩეხი მარტინცოვა, ამერიკელი როჯერსი, ბელგიელი მერტენსი, შვეიცარიელი ბენჩიჩი და ხორვატი ვეკიჩი დაამარცხა.
საბალენკა WTA-ს ტურნირების ფინალში მეოცედ ითამაშებს, მოგებული კი 11 შეჯიბრი აქვს. ამჯერად, გადამწყვეტ მატჩში მისი მეტოქე ყაზახეთის სახელით მოთამაშე ელენა რიბაკინა იქნება, რომელმაც მე-2 ნახევარფინალში კიდევ ერთ ბელარუს ვიქტორია აზარენკას 7:6 (7:4), 6:3 სძლია. ფინალი 28 იანვარს, თბილისის დროით 12:30 საათზე დაიწყება.
კომენტარები