ჭიდაობა | დიეგო ჩხიკვაძემ 23-წლამდელთა ევროპის ჩემპიონატი ზედიზედ მეორედ მოიგო

• ქართველმა ფალავანმა ფინალში თურქ მეტოქეს 2:1 სძლია
• გუნდურ ჩათვლაში საქართველოს ნაკრებმა მე-2 ადგილი დაიკავა

საქართველოს ბერძნულ-რომაული სტილით მოჭიდავეთა ნაკრების წევრი დიეგო ჩხიკვაძე (67 კგ.) ევროპის 23-წლამდელთა ჩემპიონატის გამარჯვებული ზედიზედ მეორედ გახდა.

ქართველმა ფალავანმა ტიტულის შენარჩუნება რუმინეთის დედაქალაქ ბუქარესტში მიმდინარე ტურნირზე მოახერხა, სადაც ფინალში თურქ მუსტაფა საფა ილდირიმს გადაეყარა და 2:1 მოიგო.

შეგახსენებთ, რომ დიეგომ კვალიფიკაციაში ისრაელის ნაკრების წევრ შონ ნადორგინს 7:0 სძლია და პრობლემები არც შემდგომში შექმნია: მეოთხედფინალში უკრაინელი მაკსიმ ლიუ 9:0 დაამარცხა, ნახევარფინალში კი ვადაზე ადრე საქმე სომეხ აშოტ ხაჩატრიანს მოუთავა – 11:0.

დღესვე ბრინჯაოს მედლების მოპოვება შესძლეს გიორგი ჩხიკვაძემა (72 კგ.) და საბა მამალაძემ (82 კგ.). რეპეშაჟის გადამწყვეტ რაუნდში პირველმა რუმინელ იგორ ანდრეი ბოტეზს სძლია (5:0), მეორემ კი – სერბ ბრანკო კოვაჩევიჩს (5:1). ბრინჯაოსთვის იბრძოდა დიმიტრი ხაჩიძეც (60 კგ.), თუმცა, თურქ მერტ ილბარსთან 0:10 წააგო.

შეგახსენებთ, რომ გუშინ საქართველოს ნაკრების წევრებმა 2 ვერცხლის მედლის მოპოვება შესძლეს. კვარცხლბეკზე გიორგი შოთაძე (63 კგ.) და გიორგი ცოფურაშვილი (130 კგ.) ავიდნენ.

ამგვარად, საქართველოს ნაკრებმა 23-წლამდე ბერძენ-რომაელთა ევროპირველობაზე 1 ოქროს, 2 ვერცხლისა და 2 ბრინჯაოს მედალი მოიპოვა, გუნდურ ჩათვლაში 125 ქულა მოაგროვა და თურქეთისა (127) და უკრაინის (126) შემდეგ, მე-3 ადგილი დაიკავა.