- მერი არაბიძეს 9 ტურში არ წაუგია და 7.0 ქულა აქვს
- ქართველი მოჭადრაკე ჩემპიონობასთან ახლოსაა
საქართველოს ქალ მოჭადრაკეთა ნაკრების წევრი მერი არაბიძე (2433) ევროპის რიგით 23-ე ჩემპიონატის ლიდერებში იმყოფება.
ტურნირს მონტენეგროს ქალაქი პეტროვაცი მასპინძლობს და უკვე 9 ტური მიილია, არაბიძეს კი ჯერ პარტია არ წაუგია. მერიმ 5 გამარჯვება იზეიმა, 4-ჯერ კი ყაიმს დასჯერდა და 7.0 ქულა მოაგროვა.
ქართველი მოჭადრაკის გარდა, ასეთივე მონაგარი აქვთ პოლონელებს – ალეკსანდრა მალტევსკაიასა (2388) და ოლივია კოლბასას (2406) და ასევე ფრანგ პოლინ გიშარს (2379).
საინტერესოა, რომ მიმდინარე ევროპის ჩემპიონატზე პირველი განთესვა ბელა ხოტენაშვილს (2491) აქვს, რომელიც 6.5 ქულით მე-5 ადგილზეა და ჩემპიონობის შანსს ისიც ინარჩუნებს.
ასევე 6.5 ქულით მეათეა სალომე მელია (2366), ლელა ჯავახიშვილი (2443) 6.0 ქულით მე-13 პოზიციაზეა, ლილე ქორიძე (2122) 5.5 ქულით 30-ეა, დიანა ლომაია (1950) 4.5 ქულით – 74-ე, ნია დონღვანი (2025) 4.0 ქულით – 83-ე, ხოლო ელენე წოწონავა (2030) 3.5 ქულით – 107-ე.
ევროპის ჩემპიონატზე სულ 11 ტური ჩატარდება, ამდენად, ჩემპიონის ვინაობას 29 მარტს შევიტყობთ.
კომენტარები