- საქართველოს ნაკრებმა გერმანია 4:2 დაამარცხა და ბრინჯაო მოიპოვა
- ისტორიული მსოფლიოს ჩემპიონატი საქართველოსთვის - მთავარი ფაქტები
- მოგება სამ ძლიერ მეტოქესთან - საქართველო ბრინჯაოსთვის იბრძოლებს
საქართველოს ძიუდოისტთა ნაკრებმა (ვაჟები და გოგონები) მსოფლიოს ჩემპიონატზე გუნდურ შეჯიბრში ბრინჯაოს მედალი მოიპოვა!
ქართველმა ძიუდოისტებმა ბრინჯაოსთვის გადამწყვეტ შეხვედრაში გერმანიის ნაკრები დამაჯერებლად, 4:2 დაამარცხეს. ეთერ ასკილაშვილმა და სოფიო სომხიშვილმა თავიანთი ბრძოლები წააგეს, მაგრამ, სამაგიეროდ, ლაშა შავდათუაშვილმა, ლაშა ბექაურმა და გურამ თუშიშვილმა აჯობეს მეტოქეებს, ხოლო გადამწყვეტ, მე-6 ბრძოლაში ეთერ ლიპარტელიანმა სეიჯა ბალჰაუსი ვაზარით დაამარცხა, რის შედეგადაც, საქართველომ ბრინჯაო მოიპოვა.
საქართველო 4:2 გერმანია
ლაშა შავდათუაშვილი 1:0 ალექსანდერ ბერნდ გაბლერი
ეთერ ასკილაშვილი 0:1 ჯოვანა სკოჩიმარო
ლაშა ბექაური 1:0 მარტინ მატიასი
სოფიო სომხიშვილი 0:1 ანა მონტა ოლეკი
გურამ თუშიშვილი 1:0 ლოსენი კონე
ეთერ ლიპარტელიანი 1:0 სეიჯა ბალჰაუსი
საქართველოს ნაკრებმა გუნდურ მსოფლიოს ჩემპიონატზე გამოსვლა A ჯგუფში დაიწყო, სადაც მონღოლეთი (4:2) და ბრაზილია (4:3) დაამარცხა, ხოლო შემდეგ იაპონიასთან წააგო (1:4) და რეპეშაჟში გადავიდა, სადაც უზბეკეთის ნაკრებთან გაიმარჯვა (4:2). უფრო ვრცლად აღნიშნული გზის შესახებ მოცემულ ბმულზე შეგიძლიათ წაიკითხოთ...
გუნდურ შეჯიბრში მსოფლიოს ჩემპიონი იაპონიის ნაკრები გახდა, რომელმაც ფინალში დრამატულ ბრძოლაში 4:3 აჯობა საფრანგეთის ნაკრებს. ბრინჯაოს მედალი კი საქართველოს გარდა, ნიდერლანდების ნაკრებსაც ერგო, რომელმაც მაროკოს ნაკრები დაამარცხა.
შეგახსენებთ, რომ ინდივიდუალურ პირველობაზე საქართველო 12 ძიუდოისტით იყო წარმოდგენილი და 4 მედალი მოიპოვა - ტატო გრიგალაშვილი და ლუკა მაისურაძე ოქროს, ლაშა ბექაური ვერცხლს, ხოლო გიორგი სარდალაშვილი ბრინჯაოს დაეუფლა. ამ შედეგით საერთო ჩათვლაში მამაკაცებს შორის საქართველომ პირველი ადგილიც დაიკავა, რაც ისტორიაში პირველად მოხდა.
კომენტარები