- ქართველმა მოჭადრაკემ ბაქოში მიმდინარე ტურნირზე დიდ წარმატებას მიაღწია
- ბელა ხოტენაშვილის მომდევნო მეტოქე ჩინელი ტან ჟონგი იქნება
საქართველოს ქალ მოჭადრაკეთა ნაკრების ერთ-ერთი ლიდერი ბელა ხოტენაშვილი ფიდე-ს მსოფლიო თასის მეოთხედფინალში ითამაშებს.
ხოტენაშვილმა ამ წარმატებას მსოფლიო რეიტინგის მე-4 ნომერ ჰამპო კონერუსთან მოგების (3:1) წყალობით მიაღწია.
საინტერესოა, რომ კლასიკურ პარტიებში ქართველმა და ინდოელმა მოჭადრაკეებმა მოგებები გაცვალეს (ორივემ შავებით იმარჯვა), დამატებითი 2 სწრაფი პარტია კი ხოტენაშვილის გამარჯვებით დასრულდა.
უკვე ცნობილია, რომ მეოთხედფინალში ბელას კიდევ ერთი ძლიერი მეტოქე – ჩინელი ტან ჟონგი (მე-6 განთესვა) ელის, გამარჯვების შემთხვევაში კი, საქართველოს ნაკრების წევრი ფინალის საგზურისთვის ჰარიკა დრონავალისა (ინდოეთი) და ალეკსანდრა გორიაჩკინას (რუსეთი, ფიდე-ს სახელით თამაშობს) შორის უმჯობესს შეხვდება.
დანარჩენი მეოთხედფინალები ასე დაკომპლექტდა: ელიზაბეტ პაეტცი (გერმანია)-ანა მუზიჩუკი (უკრაინა), პოლინა შუვალოვა (რუსეთი)-ნურგიულ სალიმოვა (ბულგარეთი).
მეოთხედფინალის პარტიები 12 და 13 აგვისტოს ჩატარდება, საჭიროების შემთხვევაში კი, ტაი-ბრეიკი 14 აგვისტოს არის დაგეგმილი.
ბაქოში მიმდინარე მსოფლიო თასის საპრიზო ფონდი 2.5 მილიონი დოლარია, საიდანაც კაცთა შორის ჩემპიონი 110 ათასს მიიღებს, ხოლო ქალთა შორის საუკეთესო – 50 ათასს. ფინალური მატჩი 22-24 აგვისტოს შედგება.
კომენტარები