ოქრო გუნდურში - საქართველოს ახალგაზრდული ნაკრები ევროპის ჩემპიონია

• საქართველოს ახალგაზრდული ნაკრები ევროპის ჩემპიონია
• ქართველებმა ოთხივე შეხვედრა პრობლემების გარეშე მოიგეს

ნიდერლანდების ქალაქ ჰააგაში დასრულდა ევროპის ახალგაზრდული ჩემპიონატი ძიუდოში, რომლის ბოლო საშეჯიბრო დღეს, საქართველოს ნაკრები გუნდურში ევროპის ჩემპიონი გახდა.

საქართველოს ახალგაზრდულმა ნაკრებმა პირველ ეტაპზე საბერძნეთს დამაჯერებლად, 4:1 აჯობა. თავიანთი შეხვედრები მოიგეს ეთერ ასკილაშვილმა, ნინო ლოლაძემ, თამაზ კობერიძემ და გიორგი ბადუაშვილმა. მეოთხედფინალში ქართველმა ძიუდოისტებმა პორტუგალიის ნაკრებსაც უპრობლემოდ სძლიეს - 4:1.

ამჯერად შალვა გურეშიძემ, კოტე კაპანაძემ, ნინო პაპიძემ და ლოლაძემ გაიმარჯვეს, ხოლო მარცხი კობერიძემ განიცადა. ნახევარფინალში საქართველოს ნაკრებს უფრო რთული მეტოქე ჰყავდა, საფრანგეთი, თუმცა გამარჯვება მაინც მოახერხა, თანაც საკმაოდ დამაჯერებლად - 4:2. გურეშიძემ, კობერიძემ, გიორგი ტერაშვილმა და ლოლაძემ თავიანთი მეტოქეები დაამარცხეს, პაპიძე და ასკილაშვილი კი დამარცხდნენ.

ქართველი ძიუდოისტები ფინალშიც შეუჩერებლები იყვნენ და ნიდერლანდებს იოლად, 4:1 მოუგეს. ბოლო, საჩემპიონო ბრძოლა თამაზ კობერიძემ ბრწყინვალე სტილში იპონით მოიგო. ამგვარად, საქართველოს ახალგაზრდული ნაკრები ევროპის გუნდური ჩემპიონია.

შეგახსენებთ, რომ მანამდე ინდივიდუალურ პირველობაშიც საქართველოს ვაჟთა ნაკრებმა 4 მედალი მოიპოვა (თენგო ზირაქაშვილი, გიორგი ტერაშვილი და შალვა გურეშიძე - ოქრო, ლუკა ბაბუციძე - ბრინჯაო), რითაც პირველი ადგილი დაიკავა.