ჩემპიონთა ლიგა | 7 გოლი მიუნხენში, ზალცბურგის რეკორდი, ბრწყინვალე არსენალი

სანდრო მისირელი

ჩემპიონთა ლიგის ჯგუფური ეტაპის პირველი ტური დასრულდა
ბაიერნმა წაუგებელი მატჩების სერია 35-მდე გაზარდა
ზალცბურგმა რეკორდულად ახალგაზრდული გუნდით მოიგო
კვარაცხელია ადრე შეცვალეს! ხვიჩამ უკმაყოფილება ვერ დამალა

დღის ცენტრალურმა მატჩმა იმედები გაამართლა: მიუნხენის ბაიერნისა და მანჩესტერ იუნაიტედის დაპირისპირებაში 7 გოლი ვნახეთ!

რეკორდმაისტერმა პირველი ტაიმი სანეს და გნაბრის გოლებით 2:0 მოიგო, მაგრამ მეორე ტაიმის დასაწყისში ჰოილუნდმა იუნაიტედი თამაშში დააბრუნა. მართალია, ჰარი კეინმა მალევე აღადგინა 2-ბურთიანი სხვაობა და თითქოს მიუნხენურ გრანდს ეს მატჩი გამარჯვებამდე უპრობლემოდ უნდა მიეყვანა, მაგრამ 88-ე წუთზე კაზემირომ კიდევ ერთხელ დაძაბა სიტუაცია. ბაიერნი მათის ტელმა იხსნა, რომელმაც 92-ე წუთზე ანგარიში 4:2 გახადა. თუმცა კაზემირომ მსაჯის მიერ დამატებულ მე-5 წუთზე ერთიც გაიტანა და საბოლოოდ 4:3.

🟠 ამ გამარჯვებით ბაიერნმა ჩემპიონთა ლიგის ჯგუფურ ეტაპზე წაუგებელი მატჩების სერია 35-მდე გაზარდა.

🟠 თომას მიულერმა ჩემპიონთა ლიგაში ბაიერნის ფორმით საიუბილეო, მე-100 გამარჯვება იზეიმა (143-ე მატჩში). ევროპის ელიტარულ საკლუბო ტურნირზე 100-ზე მეტი მოგება მხოლოდ ორ ფეხბურთელს აქვს: კრიშტიანო რონალდოს (115) და იკერ კასილიასს (101).

ლონდონის არსენალმა პსვ ეინდჰოვენთან ფავორიტის სტატუსი გაამართლა: მიკელ არტეტას გუნდმა ეინდჰოვენი 4:0 გაანადგურა. ლისაბონის ბენფიკა საკუთარ მოედანზე მოულოდნელად დამარცხდა ზალცბურგთან - გუნდთან, რომელმაც ჩემპიონთა ლიგის ისტორიაში ყველაზე ახალგაზრდა გუნდით ითამაშა. ზალცბურგის საშუალო ასაკი მხოლოდ 21 წელი და 183 დღე გახლდათ, რაც ახალი რეკორდია. პარალელურ მატჩში სევილიამ და ლანსმა ქულები გაიყვეს (1:1).

წინა სეზონის ფინალისტ მილანის ინტერს რეალ სოსიედადთან ძალიან მძიმე თამაში ჰქონდა - "ნერაძურის" ქულა ლაუტარო მარტინესმა გადაურჩინა (87-ე წუთზე).

A ჯგუფი

ბაიერნი 4:3 მანჩესტერ იუნაიტედი

გოლები: 1:0 სანე (28), 2:0 გნაბრი (32), 2:1 ჰოილუნდი (49), 3:1 კეინი (53-პენ), 3:2 კაზემირო (88), 4:2 ტელი (92), 4:3 კაზემირო (95)

ბაიერნი (4-2-3-1): ულრაიხი - ლაიმერი, უპამეკანო, კიმი, დევისი - გორეტცკა, კიმიხი - სანე (87. ტელი), მუსიალა (75. ჩუპო-მოტინგი), გნაბრი (63. კომანი) - კეინი (87. მიულერი).

მანჩესტერ იუნაიტედი (4-1-4-1): ონანა - დალოტი, ლინდელოფი, მარტინესი, რეგილონი - კაზემირო - პელისტრი (81. გარნაჩო), ბრუნო ფერნანდეში, ერიკსენი (69. მაკტომინეი), რაშფორდი - ჰოილუნდი (81. მარსიალი).