- ტომ ასპინალმა სერგეი პავლოვიჩი პირველივე რაუნდში დაანოკაუტა
- ტომი მესამე ბრიტანელი გახდა, რომელმაც UFC-ის ქამარი მოიგო
UFC-ის მძიმე წონის დროებითი ქამრისთვის ჩხუბში ბრიტანელმა მებრძოლმა ტომ ასპინალმა (14-3) რუსი სერგეი პავლოვიჩი (18-2) პირველივე რაუნდში დაანოკაუტა. ასპინალს პავლოჩის დასაფინიშებლად 1 წუთი და 9 წამი ეყო.
სერგეიმ, რომელსაც ზედიზედ 6 ბრძოლა ჰქონდა პირველ რაუნდში მოგებული, ტომს ორი კარგი დარტყმა გაუტარა, თუმცა ბრიტანელმა გაუძლო. მალევე, ტომმა სწრაფი მარჯვენა-მარცხენა კომბინაციით გაუტარა რუსს დარტყმები და პავლოვიჩიც ძირს დაცემამდე ნოკაუტში აღმოჩნდა.
ამგვარად, ასპინალი მესამე ბრიტანელი მებრძოლი გახდა, რომელმაც UFC-ის ქამრის მოგება მოახერხა. აქამდე ორგანიზაციის სრულფასოვანი ჩემპიონები მაიკლ ბისპინი და ლეონ ედვარდსი (21-3) გახდნენ.
აღსანიშნავია, რომ ტომ ასპინალმა სერგეი პავლოვიჩთან ბრძოლა დაუგეგმავად აიღო. პლუს, ინგლისელს ტრავმის გამო ჩხუბამდე 10 დღის მანძილზე არ უვარჯიშია. თუმცა, დაზიანებას და სრულფასოვანი მოსამზადებელი ეტაპის არქონას ბრიტანელზე არ უმოქმედია - ტომმა წონის ყველაზე საშიში მებრძოლი, ფაქტობრივად, უპრობლემოდ დაამარცხა.
რა იქნება ასპინალისთვის შემდეგი ნაბიჯი, ჯერ უცნობია. დროებითი ქამარიც ჯონ ჯონსის (27-1) ტრავმის გამო გათამაშდა - "ბოუნსს" სტიპე მიოჩიჩთან (20-4) უნდა ეჩხუბა, თუმცა მატჩი ჩაიშალა. არ არის გამორიცხული, ტომის მომდევნო მეტოქე სირილ განი (12-2) იყოს, რომელმაც მიმდინარე წლის სექტემბერში სეგეი სპივაკი (16-4) დააფინიშა.
კომენტარები